Indekashon 2026

APC ta otorgá 0,51% di indeksashon ku no a duna anteriormente

Willemstad, 28 di ougustus 2026 – Algemeen Pensioenfonds van Curaçao (APC) ta oumentá e penshonnan ku 0,51% i ta duna asina un parti di e indeksashon ku no a otorgá anteriormente. E oumento ta drenta na vigor pa 1 di yanüari 2026 i lo paga penshonadonan e diferensia ku efekto retroaktivo for di e fecha ei. E duurtetoeslag tambe ta subi ku 0,51%.

Den añanan anterior, APC no semper por a duna e indeksashon kompleto di penshon. E parti di e indeksashon ku APC no por a duna e tempu ei ta keda registrá komo indeksashon ku a falta. Ora e posishon finansiero di e fondo di penshon ta permití, Direktiva di APC por disidí pa duna un parti di e indeksashon ei ainda.

Posishon finansiero ta hasi e oumento posibel
E posishon finansiero di APC a sigui mehorá na 2025. Na final di 2025, e grado di kobertura tabata 115,6%. E grado di kobertura ta indiká te kon leu e fondo di penshon tin sufisiente kapital pa kumpli ku su obligashonnan di penshon, tantu awor komo den futuro.

Pa por duna indeksashon ku a falta, sierto kondishonnan ta konta. Segun e maneho di indeksashon di APC, e fondo por otorgá indeksashon ku a falta ora e grado di kobertura ta mas altu ku 115%, bou di kondishon ku e otorgamentu no baha e grado di kobertura bou di 115%. A base di e posishon finansiero di e fondo, Direktiva a disidí ku tin espasio pa otorgá 0,51% di e indeksashon ku no a duna anteriormente. Ku esaki, APC ta hasi uso di e espasio máksimo disponibel dentro di e reglanan vigente. Despues di e oumento akí, e grado di kobertura di e fondo ta keda na 115%.

No tin indeksashon regular, pero parti di indeksashon ku no a duna anteriormente
E oumento di 0,51% ta separá for di e indeksashon regular di penshon. Anteriormente APC a komuniká ku no tin indeksashon regular pa 1 di yanüari 2026, pasobra e salarionan di empleadonan públiko no a keda indeksá entrante e fecha ei.

E oumento ku APC ta duna awor ta un parti di e indeksashon ku APC no por a duna kompletamente den pasado pa motibu di e posishon finansiero di e fondo den añanan anterior.

Kiko esaki ta nifiká pa partisipantenan?
Pa penshonadonan di APC, e desishon ta nifiká ku nan penshon ta subi ku 0,51% for di 1 di yanüari 2026. Si e duurtetoeslag ta aplikabel, esaki tambe ta subi ku e mesun porsentahe.

APC ta prosesá e oumento den luna di novèmber 2026. Penshonadonan lo risibí tambe e pago adishonal ku forsa retroaktivo for di yanüari 2026.

E oumento ta apliká tambe pa e derechonan di penshon akumulá riba promé di yanüari 2026 di partisipantenan aktivo i partisipantenan ku ya no ta pagando prima.

Indeksashon ku a falta ta keda registrá
Ku e oumento akí, APC ta otorgá un parti di e indeksashon ku a falta den pasado. E parti ku sobra ta keda registrá. Si den futuro APC por duna un otro parti, esaki ta dependé di e posishon finansiero di e fondo i e kondishonnan ku ta aplikabel pa esaki.

APC ta sigui konsiderá kuidadosamente e balansa entre un posibel oumento di penshon i e siguridat finansiero di penshon riba término largu.