Durante e selebrashon di Dia di Penshonado riba 27 di yüli 2026, direktora di APC, sra. Evelyn Kruithof-Bor, a dirigí un diskurso den kua el a para ketu na e aporte balioso di nos penshonadonan na nos komunidat. Tambe el a papia tokante e importansia di keda aktivo den bida, e situashon finansiero sólido di APC i e futuro ku nos ta sigui traha riba dje huntu. Akí bo por lesa e diskurso kompletu.

Toespraak Dia di Penshonado
27 juli 2026
Spreker: APC Directeur Evelyn Kruithof-Bor

Presidente i miembronan di Direktiva di UPAH,
Penshonadonan,
Damas i kabayero, bon dia.

Un felis mainta i danki na direktiva di UPAH pa e invitashon pa nos selebrá Dia di Penshonado awe huntu ku boso.

Dia di Penshonado no ta trata solamente e tópiko di penshun, sino ta un momento pa prinsipalmente nos para ketu na e aporte balioso di nos penshonadonan. Personanan ku durante hopi aña a traha ku dedikashon, a asumi responsabilidat i a kontribuí na nan famia, nan organisashon i na nos komunidat.

P'esei, awe ta prinsipalmente un dia pa topa ku otro, disfrutá di músika, rekordá bon momentunan i pa huntu nos selebrá.

I ora nos ta papia di disfrutá huntu, nos ta papia tambe di keda aktivo den bida.

Esaki ta netamente e pensamentu tras di e tema di nos Relato Anual (jaarverslag) 2025:

Mas ku Penshon: Aktivo den Bida.

Naturalmente, penshun ta nifiká siguridat finansiero. E ta duna un base sólido i trankilidat despues di hopi aña di labor. Pero penshun ta trata tambe di independensia, dignidat i e posibilidat pa sigui partisipá aktivamente den nos komunidat.

Keda aktivo no tin mesun nifikashon pa nos tur. No ta trata di kuantu bo ta hasi. Ta trata di keda konektá ku e personanan i e mundu rònt di bo na bo mes manera.

E mesun pensamentu ei tabata sentral durante e konferensia Happy Aging, ku APC a organisá huntu ku University of Curaçao.

Enbehesé ta un proseso natural. Sinembargo, enbehesé BON ta rekerí atenshon.

P'esei, awe mi ke duna boso un mensahe simpel:

Sigui duna atenshon na boso salú.
Sigui buska kontakto ku personanan rondo di boso.
I keda aktivo pa asina duna balor na kada dia di nobo.

Pa APC ta importante pa nos keda serka di boso

I p'esei nos a bin ta skucha ku hopi atenshon loke nos partisipantenan i penshonadonan a kompartí ku nos. A resultá ku tin hopi konfiansa den APC, pero tambe ku informashon tokante penshun tin biaha ta basta tékniko.

Nos a tuma esaki na serio. P'esei, den e periodo ku ta bin, nos lo organisá seshonnan di informashon na un eskala mas chikí na diferente sentronan di bario.

Keda pendiente pa mas informashon.

APC ta finansieramente sólido

Nos responsabilidat mayó ta kuida boso penshon ku kautela i di un manera prudente.

Ku un maneho bon balansa, perseveransha i fleksibilidat kaminda mester, APC a logra un posishon finansiero sólido. APC a sera aña 2025 ku resultadonan positivo. Nos grado di kobertura a sera na 115.6%.

Nos ta sigui manehá e fondonan di APC di un manera prudente, semper buskando un bon balansa entre rendimentu, risiko i balor pa nos komunidat.

Manera ta konosí, nos areglo di penshun ta permití un indeksashon ora gobierno indeksa e salario di ambtenarnan. Gobierno a informa nos ku lo no tin indeksashon di salario di ambtenar entrante prome di januari 2026. Esaki ta nifiká ku e penshunnan tampoko lo haña indeksashon regular.

No opstante esaki, nos ta analisando e posibilidatnan ku por tin, mirando e posishon finansiero fuerte di APC. Manera ta kustumber, APC ta tuma desishon di un manera responsabel i bon balansá na bienestar di e kolektividat. Esaki ta base pa e konfiansa ku boso a depositá den nos.

Responsabilidat ta nifiká tambe ku nos ta duna klaridat ora tin preguntanan.

Algun di boso por a tuma nota di e notisianan resien tokante APC Bank.

APC Bank a bira aktivo na juli 2025, tumando over PSB Bank, i e banko a keda enkargá ku e operashon di CHB. E proseso di kombina sistemanan, prosedura di traha i e diferente timnan ta tuma tempu.

Resientemente a trese algun kambio den maneho i den e organisashon, komo meta pa fortalesé e banko mas ahun.

Komo akshonista, APC Pensioenfonds ta sigui e desaroyo aki di aserka.

APC Bank ta finansieramente sólido, e servisio na klientenan ta sigui normal i, meskos tur otro banko, APC Bank ta kai bou di e supervishon regular di Centrale Bank van Curaçao en Sint Maarten.

Pa boso, loke ta mas importante ta esaki:

APC Bank i APC Pensioenfonds ta dos organisashon diferente. E desaroyonan na APC Bank no tin influensia riba boso penshun ni riba e pago di esaki.

Si tin pregunta tokante e tópiko aki, boso por aserka nos libramente, pasombra ta nos só por duna bo e informashon korekto.

Mientras nos ta selebrá Dia di Penshonado awe, nos ta fiha tambe riba loke ta na kaminda.

Otro aña, APC lo selebrá, ku Dios su poder, 90 aña di eksistensia.

Nobenta aña di APC ta nifiká nobenta aña brindando siguridat na diferente generashon na Kòrsou. E ta nifiká tambe nobenta aña di eksperensia, personanan ku a laborá, konstruí, kuída i kontribuí na nos komunidat.

P'esei, e historia ei no ta pertenesé solamente na APC. E ta pertenesé na boso tambe.

Nos ta trahando ku hopi entusiasmo riba e programa pa e jubileo spesial aki. Mas despues den aña, nos lo kompartí mas detaye di esaki ku boso.

Pero awe nos no mester antisipa riba tur plan ku ta na kaminda.

Awe ta un dia pa nos selebrá huntu.
Un dia pa disfrutá di e músika i rekordá bon momentunan.

Mi mensahe na boso ta:

Keda aktivo den bida, kada unu na su manera. Sigui mustra interes. Sigui kompartí boso eksperensia pa e futuro generashon. I mas ku tur kos, sigui disfrutá di e personanan i e momentonan balioso ku ta duna sentido na boso bida kada dia di nobo.

Mi ta gradisi boso pa e konfiansa depositá den APC!

APC ta sigui kana ku boso. Ayera, awe i mañan.

Danki pa boso atenshon i disfrutá di un Dia di Penshonado karga ku bendishon i alegria.