Update
Indekashon

Indekashon 2025

Indeksashon di penshon ku 1.54% entrante 1 di yanüari 2025

Direktiva di APC a tuma desishon pa oumentá e penshon di tur su partisipantenan ku 1.54% entrante promé di yanüari 2025. Lo paga e oumento akí ku forsa retroaktivo na luna di yüli 2025.

Dikon indeksashon?

Indeksashon ta un manera pa permití penshon krese debí na oumento di kosto di bida. Asina e penshonadonan por mantené nan forsa di kompra. E indeksashon di e penshon ta relashoná ku e oumento di salario pa ámtenarnan. Entrante 1 di yanüari 2025, gobièrnu a disidí di oumentá salarionan ku 1.92%.

Basá riba artíkulo 30 di e areglo di penshon pa funshonarionan públiko (PLVO), APC por implementá e oumento akí – kompleto òf parsialmente – den e penshonnan, dependiendo di e situashon finansiero di e fondo.

Kiko ta determiná kuantu por indeksá?

E posibilidat pa indeksá kompleto òf parsial ta dependé di e grado di kobertura (dekkingsgraad) di e fondo di penshon. E grado di kobertura ta indiká na ki grado APC ta posishoná pa por kubri tur su obligashonnan di penshon riba término largu. Mas  altu e grado di kobertura ta, mas espasio tin pa indeksashon.

E reglanan ta lo siguiente:

• Ku un grado di kobertura di 115% òf mas, por indeksá kompletamente.
• Ku un grado di kobertura entre 105% i 115%, por indeksá parsialmente.
• Si e grado di kobertura ta 105% òf ménos, no por indeksá.

Kiko tabata e grado di kobertura di APC?

E grado di kobertura di APC tabata 113% na 31 di desèmber 2024. Esaki ta nifiká ku e fondo ta kai den e kategoría kaminda indeksashon parsial ta permití. Basá riba e grado di kobertura akí, a tuma e desishon pa oumenta penshon ku 1,54%, k uta oicho désimo parti di 1,92%.

Kiko ta pasa ku e 0,38% ku falta?

E oumento kompleto di e salario gubernamental tabata 1,92%. No ta konsiderá e diferensia di 0,38% kompará ku e indeksashon di salario komo indeksashon pèrdí. Esaki ta keda registrá i lo por otorgá esaki den futuro, si e situashon finansiero di e fondo pèrmití esaki den futuro.

Ki dia penshonadonan ta haña e oumento?
E oumento di 1,54% lo drenta na vigor formalmente dia promé di yanüari 2025, pero e pago lo tuma lugá den luna di yüli 2025, inkluyendo  e pago adishonal di e promé mitar di aña. Bo a baha ku penshon den 2025? Esei ta nifiká ku bo lo risibí e indeksashon den luna di ougùstùs.